في حبك يا مصر ...نهون السجون ..و الشجون و المواجع و يغلا مع القهر حبك يا مصر لو يحبسوني و لو فكروا بالعذاب يبعدوني ح اقرب و اقرب ممكن اهرب تنزل دموعي ع خدودي تشرب تلاقي الرموش و الخدود و صورتك عليهم يا مصر با حبك يا مصر.
الشاعر أحمد فؤاد نجم , القاهرة , 1975
لما عرضت ع الوالد موضوع التدوين , اول كلمة حكالي اياها اه حلو بس شو رح تكتبي؟؟ ما جاوبت كان عندي زحمة أفكار فحكالي منيـــــــح بس اكتبي وصيتك . كان المفروض اني اكتب اشي عن بلدي و الوضع الي بصير فيها و كل القصص و الحكايات الي حابة احكي عنها . و انا بلحظة تفكير نيوتونية نبغت في بالي و صرخت وجدتها .... مزبوط الحارة عنه فاقت من النوم و الوالد و الوالدة لبسوا ادرعة الحرب فكروا الحرب قامت بس اه قررت اكتب عن مصر . مش انتقد لا والله مش ناقصة نقد لا اكتب عن مشاعري اتجاهها اعتبر البوست الاول كرسي اعتراف لمصر بحبي ........ (حب بريء )
اكشن اول مشهد:
مصر , أم الدنيا . لما قررت اكتب ما لقيت أفضل من ابلغ العبارات الي فوق للشاعر العملاق الي انا اعشقه " عشق ادبي والله" فعذرا ع استعمال الكلمات بس انا ذكرت المصدر مش سرقة يعني . قررت اكتب عن مصر , لانه كلنا تربينا ع حب مصر و ام العروبة و ام الدنيا حتى من شدة الذكاء و انا طفلة بريئة كنت افتكر انه العرب هم مصر و بس , اه ذكاء سبحان الله قال ليش الفلسطينية انخرب بيتهم من هبلهم قصدي من ذكائهم . لانه كلنا تعلمنا عن النيل و انه الي بيشرب من مية النيل يزيد حبه للوطن و يصير اقوى . و عشان طبعا جابلونا بامتحان الثانوية العامة قبل مليون سنة كده نرسم خريطة مصر و نبين النيل و نحدد المواقع و بما اني رسامة بدرجة انه ممكن يطلع الأرنب فيل معرفتش ارسم و راحت علي العلامات بس نجحنا و مشي الحال. عشان هيك قررت افتتح مدونتي المتواضعة جدا عن مصر.
اكشن ثاني مرة:
ببساطة بدي اكتب عن مصر , لان معظم الاشخاص الي انا بحبها فعلاً و بتواصل معها من مصر , لدرجة انه صرت احكي كلمات مصرية باللهجة الفلسطينية و يطلع خليط ربنا يعلم من وين طلع , ع راي زميل مصري رائع خليط رهيب.... بس بحب الناس الطيبة فيها . مصر لانه معظم الشعراء الي انا بعشق ما كتبوا و مش رح اعدد اسماء لانهم كلهم اساتذة و لهم في القلب مكانه و تقدير. اكشن ثالث مرة:
ههههههه , عارفة زهقتم و حتقولولي حبي و لا اكرهي و احنا مالنا زهقتي عيشتنا , هي ناقصه؟؟ لا يا اخواتي بس عشان مصر اليوم مجروحة و كل بلد مجروح بحس في الي مجروح مثله. مصر اعظم و اغلى من الي بصير فيها , بغض النظر عن الي بصير فيها اليوم و انا لا يحق لي التنظير لاني مش عايشه فيها . بس بتالم عليها و ع ناسها الاصيلة الي بتحب بلدها و خايفة عليها و شايلة بدمها حب مصر و نيلها.
تحياتي لكل من شرفني بالزيارة و اطلع ع خربشاتي الي خارجة من روح محبطة و نفسيه مخشبه و عقل متجمد ... اعذروني ع الاطاله ..فلكم جميعا الشكر و التقدير و اهلا فيكم بمدونتي الابسط نت البسيطه . عذرا ممن ارباب اللغة العربية فقد حطمتها تحطيما شنيعا .
واجب شكر للاخت و الصديقة الصدوقة اماني ....شكرا